Vieiros

Unha delegación do Consello de Seguridade das Nacións Unidas visitará Xibutí, Somalia, Sudán, Chad, a República Democrática do Congo e Costa de Marfil nunha xeira de dez días iniciada esta fin de semana.

A visita servirá para confeccionar un informe acerca da situación de guerra permanente que se vive nestes países, segundo informou o organismo, e para analizar o xeito de pórlles fin a estes conflitos armados.

A primeira parada, para abordar o problema en Somalia, estaba prevista en Xibutí, xa que se considera o territorio somalí perigoso de máis para as conversas co goberno e coa oposición. Este domingo, precisamente, o presidente, Abdullahi Yusuf Ahmed, sobreviviu a dous ataques cando trataba de chegar ao aeroporto de Mogadiscio.

A insurxencia islamista combate o feble goberno, que conta co amparo de Estados Unidos por considerar que o grupo armado ten ligazóns con Al Qaeda. Os expertos valoran negativamente este apoio incondicional de Washington a unha das partes, porque provoca un enquistamento maior do conflito.