Vieiros

Un axente grego da policía antidisturbios resultou ferido este domingo á noitiña en Atenas, como consecuencia dos disparos -vinte, segundo os seus compañeiros- realizados por dous homes que portaban armas de repetición Kalashnikov, informaron fontes oficiais.

O axente, que recibiu o impacto de dúas balas, formaba parte dunha unidade encargada de custodiar o ministerio de Cultura grego. Segundo os medios locais, púxose en marcha un intenso dispositivo policial para capturar os autores do ataque. Varias persoas xa foron detidas para seren interrogadas.

O incidente tivo lugar no distrito de Exarchia, perto de onde o adolescente Alexandros Grigoropoulos foi asasinado por un axente de policía o mes pasado. Dende aquelas, as protestas nas rúas de Atenas son diarias, algunhas violentas entre as forzas de seguridade e os manifestantes.

Protestas contra Israel
Esta mesma fin de semana, os antidisturbios dispersaron con gases lacrimóxenos centos de manifestantes que protestaban contra os bombardeos en Gaza fronte á embaixada de Israel.

Non é a primeira vez dende a morte de Grigoropoulos que se produce un ataque con armas de repetición contra a policía. Tamén en decembro, un vehículo de axentes antidisturbios foi obxecto de disparos ao seu paso pola universidade. Ningún dos seus 20 ocupantes resultou ferido.