Vieiros

Non hai volta atrás
O efecto do traballo espállase alén dos límites dos suburbios do proxecto. Aí, nos bordes, acontecen moitas cousas. Onte, no límite de C-Block, unha muller mallaba nun neno de xeito brutal. Unha escena que tería pasado desapercibida e así o fixo para a xente que pasaba por diante da casa, pero non para as nosas traballadoras e as mulleres que viñan connosco porque non mediu un minuto para que Gayalakshmi, a nosa asesora de xénero, se achegase á porta da casa para chamar educadamente a atención da muller e indicarlle que pegándolle ao neno non lle ía inculcar o amor polos estudos (que supostamente era a orixe da malleira).

Mais non é só o persoal quen comeza a saír dos límites físicos do suburbios do proxecto, tamén as mulleres, como Mumtaj, que coñeceu a unha rapaza no hospital, cando a súa filla deu a luz. Por desgraza, a outra muller, que vive tamén no borde dun dos nosos suburbios, Panju Kidangu, perdeu o fillo. A súa familia non se quería facer cargo dos gastos do funeral. Pero Mumtaj si. Así que foi ata a súa casa levarlle uns cartos. E ese mesmo día dúas traballadoras, Gayalakshmi e Caroline, foron buscar a casa desa muller para ver que precisaba. Todas estas cousas non caben nos formularios, nas matrices, nos termos técnicos, pero para min son o resultado máis evidente dun cambio que xa non ten volta atrás.

Por iniciativa propia
Muthamal e mais eu coñecémonos dende hai xa tempo. Ela vive en Kajapettai e falamos máis veces por outras cousas. Desta vez por ser integrante do consello de suburbio. Mais non lle abondou con isto. Ela mesma e por propia iniciativa decidiu poñer en marcha dous grupos de aforro novos con mulleres que aínda non se integraran en ningún.

Son 30 mulleres máis ás que ela soíña conseguiu convencer de que non tiñan que depender máis da usura. Explicoulles o funcionamento dos grupos e agora asiste ás súas xuntanzas cada mes para darlles orientación. Seguen estes inesperados e felices efectos de multiplicación.


Crónicas anteriores:

• "Durante estes días decateime do moito máis fácil que me resulta o entendemento coas feministas do sur"(1)
• Fai falta que escoite moita xente máis(2)
• A interferencia(3)
• Aquí todo o mundo casa antes dos 25 e se non o fas aí quedaches(4)
• Reconciliarme con esta costa que agora semella tan calma(5)
• Non só os cartos(6)
• Actividades altamente perigosas(7)
• Conexións(8)
• O traballo que custa ser rebelde(9)
• De culebrón, cinema e documental(10)
• Vivía sometida a guerra no seu fogar(11)
• Definitivamente, as cousas cambian(12)
• Hoxe vin...(13)
• Non hai ningún motivo para levar unha vida de violencia(14)
• Acaba de casar e xa lle prohibiron traballar(15)