Vieiros

Dúas horas despois do previsto chegaron os ciclistas do KGZ que viaxaran a Turquía, e un a un foron aparecendo pola porta, o primeiro: David García. Despois chegaron Gustavo C. Veloso, Delio Fernández, David Abal e Alejandro Paleo; o médico do equipo, Dr. Xoán M. R. Bastida; os auxiliares: Santiago Diz e Fernando Ordóñez Citoula, e o seu director deportivo, Xosé Anxo Vidal.

Camisolas con nome de David García
O protagonista da primeira rolda internacional que gaña o Karpin Galicia nos seus dous anos de historia foi recibido con pancartas por un grupo de admiradores. Para a xente que agardaba foi unha pena que o marinense non puidese amosar o seu maillot amarelo ou o trofeo de campión, por causa do atraso da equipaxe. Mais o que si fixo García foi abrir unha botella de cava para celebrar a súa tremenda progresión en sete días de carreira.

Agora quédanlle uns días de recuperación ao ciclista de Marín antes de se enfrontar ás seguintes roldas que lle teñen preparadas: a Subida ao Naranco e a Volta a Asturias.