Vieiros

"A Consellaría de Medio Rural estase inhibindo ante o coñecemento dunha ilegalidade". Así explica Carme Freire, do Sindicato Labrego Galego (SLG), o que está a acontecer con varias explotacións lácteas do país.

Dende hai xa case un mes, a comercializadora Celega, que vende ao Grupo Leite Celta, suspendeu a recollida a, polo menos, tres explotacións lácteas. A explicación é que o produto non se axeita ás súas análises de coagulación do leite (tamén chamadas probas de acidez), mais dende o SLG explican que estas probas non atenden á normativa vixente e que "non son outra cousa que novas presións sobre as explotacións para conseguir o leite a baixo prezo".

Medio Rural, un árbitro que non exerce
A devandita análise foi imposta pola propia empresa, "mesmo negándose a explicar ou deixar constancia da súa metodoloxía", de xeito que os gandeiros non poden contrastar eses resultados que xa foron determinados pola industria. Ante esta situación, os propietarios da explotación chamaron a Medio Rural, quen se encargou de facer novas analíticas, que deron como resultado un leite perfectamente apto para a comercialización e para o consumo.

Con todo, dende o SLG denuncian que a Consellaría non asumiu un papel activo exixindo á Celaga que retomase a recollida. "Lonxe de actuar como mediador, como lle correspondería, optou pola inhibición á hora de se posicionar diante da empresa para garantir a recollida, o que supón un aval á chantaxe que exercen as industrias", di Freire.

Denuncian así a "irresponsabilidade de Medio Rural ao non actuar como parte imparcial neste tipo de conflitos, abocando a parte máis débil a ficar baixo as imposicións das industrias lácteas". Na actualidade é outra empresa a que se está a encargar da recollida deste leite, mais o SLG encadra estes movementos dentro dunha "clara estratexia de amedrantamentopara deixarnos nas súas mans, para que nos recollan o leite a calquera prezo".