Vieiros

Mentres medio país anda correndo no Entroido, en Vieiros tamén estamos de celebración. Tal día como hoxe hai trece anos "nacía un pioneiro punto de encontro para os galegos na rede: Vieiros, o barrio galego en internet" que axiña comezou a facilitar información do país a todos os internautas do mundo. Ese foi o xermolo do proxecto informativo actual.

Vieiros converteuse nunha referencia dentro do xornalismo galego. Con só trece anos de vida, levamos con orgullo sermos os decanos do xornalismo dixital galego. E aquí seguimos navegando coa nosa gamela polos océanos da información. 

A folla de ruta da nosa embarcación segue a ser a mesma: contribuír á normalización política e cultural do país. Pero sabemos que non viaxamos só os que aquí debullamos o día a día.  A principal bandeira desta nave continúa a ser a participación das nosas e dos nosos lectores. Na rede intentamos tamén construír 'Un país normal', no que, dende a diferenza, collamos todos: sen exclusións.