Vieiros

Esta sexta feira na Praza da Igrexa de Lalín (Deza), ás 20:00 horas, hanse xuntar os 264 empregados de Montoto para denunciar a súa situación: até esta terza feira, debíanlles a nómina de outubro, que xa foi pagada por enteiro, e non ao 60% que propuña a empresa, mais aínda faltan as horas extras e a incerteza de saber se este mes van cobrar ou non. Apoiados polos tres sindicatos maioritarios en Galiza (UXT, CCOO e CIG), van exixir tamén a continuidade da empresa, que está a piques de mudar de xerencia.

A firma lalinense, que é líder do sector téxtil estatal nos xéneros de punto (coa marca homónima e con Boxley, alén de traballar para empresas coma Lacoste ou Cortefiel), presentou, a comezos deste mes, un proceso concursal -a antiga suspensión de pagos-, nos xulgados mercantís de Pontevedra, desculpándose nas perdas que lles estaba a ocasionar a actual crise financeira. A comezos desta semana coñecíase que a familia Montoto, creadora da marca, afastábase da xestión, ficando só como accionista. Nuns días entrará un novo xestor, alleo á familia, que traballará para poñer en marcha un novo plan de viabilidade.

"Salvar o textil é salvar o Deza"
Este é o lema que se pode ler nos carteis cos que os traballadores de Montoto empapelaron a vila de Lalín e os seus arredores, buscando a implicacón, nesta mobilización, dos traballadores das cinco cooperativas que producen para a firma e da xente do municipio. Non en van, tras a construtora Proinsa, Montoto é a empresa que máis empregos xera na comarca do Deza.

Neste momento, e segundo os sindicatos, urxe o apoio social, non só para demandarlle á empresa información sobre como marcha o proceso concursal ou o cobro do cento por cento das nóminas atrasadas, senón para facer unha chamada ás entidades financieras e aos acredores xudiciais, xa que deles depende que Montoto conte, canto antes, cun plan de viabilidade. Porén, dende os sindicatos, aínda non teñen claro se a empresa está realmente afectada pola falta de liquidez, un dos efectos da crise financeira, ou ben todo o proceso fai parte dunha serie de manobras encamiñadas a reducir o cadro de persoal, e seguir a fabricar fóra de Galiza.

Os sindicatos protestan polos 120 despidos anunciados por Caramelo
No sector téxtil galego tamén hai outra empresa que está nunha situación de incerteza, a coruñesa Caramelo. Os sindicatos con representación no Comité de Empresa, CIG e CCOO, amosaron o seu rexeite, esta quinta feira, ao plan de despedimentos e baixas que debullan os novos accionistas maioritarios, a Xunta e Manuel Jove, a través da sociedade Inveravante. Este plan podería afectar a 120 traballadores dun cadro de 850 empregados.

Agardando polo plan de viabilidade que a empresa lles vai presentar a vindeira segunda feira, o Comité non está de acordo coa contundencia das medidas anunciadas, e exixe coñecer as contas da compañía e saber como se desenvolveu o proceso de deslocalización a terceiros países. Ademais, sinalan que o plan de viabilidade non recolle a posibilidade de tramitar un ERE (Expediente de Regulación de Emprego), senón baixas incentivadas ou prexubilación, o que cualifican coma unha "fraude".

Na actualidade traballan 400 persoas nos obradoiros da Coruña. O ano pasado as perdas da empresa cifráronse en 20 millóns de euros.