Vieiros

A Conferencia do Episcopado mexicano está preocupada pola situación de inseguridade e o aumento de delincuencia que está a sufrir o país. Nunha reacción conxunta e en conferencia de prensa, os bispos Rogelio Cabrera e Ramón Castro leron un documento no que deixaron aberta a porta á aplicación da pena de morte. Piden ás autoridades e tamén aos mexicanos que "traballen en común acordo ante a ola de violencia que ameaza os pobos", apelando á fe en Xesucristo.

O Episcopado pediu así o endurecemento das penas para os policías ou os funcionarios públicos involucrados en actos ilícitos, como no caso de secuestros. Din que en casos coma estes podería contemplarse a implantación da cadea perpetua. En canto á pena capital, indicaron que á igrexa lle é difícil atopar unha xustificación real para a súa aplicación. Porén, acto seguido, os bispos xustificaron a posibilidade de adoptar esta medida extrema en certos casos. Neste sentido recordaron que o catecismo abre esa posibilidade "cando non se pode someter ao agresor". Ademais, engaden que "se as autoridades cren conveniente a promesa da pena de morte, terá que ser finalmente detallada, para evitar que no noso país poida ser acusado alguén inocente".

Antecedentes
O asunto está a xerar debate en México, despois de que nos pasados días fose outro relixioso, o representante da diocese de Celaya, quen mencionou a aplicación da pena de morte como resposta aos problemas de inseguridade. Dixo entón que sería unha "máxima benvida pola igrexa mexicana". Do mesmo xeito, advertiu que malia a que "algúns moralistas" non estivesen de acordo en implantar esta medida, si sería efectiva para "desalentar a aqueles que traballan en actos de delincuencia". Neste sentido dixo que "a igrexa avalará que haxa sancións enérxicas para aqueles que fan pocarías, desintegrando familias e torturando a outras persoas inocentes", en referencia aos últimos secuestros vividos no país. Ademais, na mesma liña, o representante da diócese mexicana asegurou que son necesarias novas medidas que deben tomar "os que saben", sobre todo tendo en conta que moitas persoas que cometen delitos graves nunha son rehabilitadas, o que, á súa vez, supón un gasto importante para o erario público.