Vieiros

Catro ex parlamentarios colombianos retidos dende hai máis de seis anos polas FARC foron liberados esta cuarta feira pola guerrilla ante delegados do goberno venezolano e do Comité Internacional da Cruz Vermella (CICR) na rexión de Guaviare, informou o organismo humanitario.

A delegada do CICR en Colombia, Bárbara Hintermann, indicou que os ex lexisladores Gloria Polanco de Lozada, Orlando Beltrán Cuéllar, Luis Eladio Pérez e Jorge Eduardo Géchem Turbay, foron entregados polas FARC ao ministro do Interior venezolano, Ramón Rodríguez Chacín, á senadora opositora colombiana Piedade Córdoba e a delegados e persoal médico.

"Están nas nosas mans e están nun estado de saúde que lles permite viaxar", afirmou Hintermann aos xornalistas en Bogotá.

Pola súa banda, as FARC anunciaron, mediante un comunicado divulgado por Caracol Radio, que non farán máis liberacións unilaterais de reféns, até que se desmilitaricen dous pobos do Valle del Cauca.