Vieiros

Outra noite para non esquecer na Liga Nacional de Billarda, que terminou coa victoria case incrible de Vicente, da equipa Safari, que xusto no último minuto, na última carreira e no último golpexo se proclamaba campión absoluto.

No multiusos de Celeiro de Mariñaos (Barreiros) e na xornada de reflexión imposíbel, Ismael, o Zidane da Billarda, quedaba desfeito, preso, segundo a organización "pola descomunal presión á que foi sometido polos palanadores da EkipA SaFaRi".

Ismael chegaba á última xornada con catro puntos de vantaxe sobre o seu perseguidor, Vicente. Mais este, armado dunha "pasmosa tranquilidade" e acompañado da sorte puido esquivar un por un os obstáculos até asaltar o liderato nunha histórica carreira que Tele-Varal, a TV da Billarda, grabou enteira, para formar parte dos grandes momentos da historia do deporte galego.

Nunca antes Vicente liderara a clasificación da Superliga de billarda, e agardou calado e sen se inmutar até o último momento, despois de 14 asaltos, para proclamarse campión absoluto e recibir, bañado en champaña, o trofeo de mans do primeiro campión da historia da LNB, David.

Despois da competición houbo festa rachada até que abriron os colexios electorais, onde moitos foron de reenganche.