Vieiros

Na xornada do sábado 26 de maio, os mellores palanadores da Liga Nacional de Billarda hanse enfrontar no pavillón de Celeiro de Mariñaos, no concello lucense de Barreiros, á volta das nove da noite, no Torneo de Clausura do que sairá o campión nacional.

A cousa anda entre o chamado Zidane da billarda, Ismael, do Cornería Team -que leva até o de agora 66 puntos-, algo por riba de Vicente, da equipa Safari, -con 62 puntos- e o último rival posíbel é Foro, dos Tronos, con 55 puntos.

Deste enfrontamento sairá o segundo campión da historia da LNB, creada hai algo máis dun ano pola Asociación Cultural O Varal. Após o campionato entregaranse os trofeos entre suores e alegrías, e despois haberá festa rachada con música dance e torrezmos da Mariña, até que, á mañá seguinte, abran os colexios electorais. O gañador do ano pasado personarase no acto, para entregar das súas propias mans o trofeo ao novo campión.

Aínda está reñida esta final, e non todo está feito para Ismael Zidane que pode que non chegue nin a cheirar o licor de toxo que gaña o vencedor absoluto da liga. Nunca se sabe pois, como din n'O Varal, hai que se preparar para vivir unha noite tola de billarda, con "sangue, coitelos afiados e reflexión imposíbel!".

Toda a información será retransmitida por Tele-Varal e a clasificación final quedará fixa nas páxinas web da asociación.