Vieiros

O 9 de novembro de 1989 milleiros de cidadáns da República Democrática Alemá botábanse ás rúas, acudían aos postos fronteirizos e até o propio Muro de Berlín que, aquela noite, comezou a esfarelar a golpe de pico e mazo marcando un punto de inflexión decisivo na historia recente. Os acontecementos precipitáranse a partir da conferencia de prensa dun membro do Politburó que, descoñecendo as instrucións precisas da cúpula do partido, deu por feito en resposta ás preguntas dos xornalistas que o permiso para saír libremente do país quedaba estabelecido de xeito inmediato.

Esta semana, Berlín é centro das celebracións en recordo daquela xornada onde se derrubaron os fechos daquela liña de cemento e espiño de 160 quilómetros que separou Alemaña en dous. A lembranza desta "Caída do Muro" que abriu a fenda decisiva cara á fin da chamada Guerra Fría, acolle así a ducias de líderes mundiais na capital alemá. A Porta de Brandeburgo será un dos centros principais dos festexos que inclúen o simbólica derrube dun milleiro de pezas xigantes a xeito de dominó ao longo dun quilómetro e medio do traxecto onde se erguera o Muro. A propia chanceleresa alemá, Angela Merkel, que daquela vivía na Alemaña oriental, recordará o momento no que atravesou o primeiro paso aberto a través do cal os berlineses do leste camiñaron até o Berlín oeste.

Recomendámoslles:

• Der Spiegel: Onde o Muro caeu por vez primeira e entrevista con Lech Walesa, "Gorbachov foi un político débil"
• BBC: Berlín celebra a caída do Muro e A vida detrás do Muro
• CNN: Hai vinte anos, cando a guerra fría rachou