Vieiros

A cifra de mortos en Padang, capital da provincia de Sumatra Occidental, e nos seus arredores, ascende xa a 770 persoas. "Todos os cadáveres foron enviados aos hospitais da provincia", informou o Ministerio de Asuntos Sociais.

Os servizos de rescate continúan á procura de vítimas e posíbeis superviventes. "O balance pode aumentar, xa que moitas persoas seguen atrapadas baixo os edificios, as vivendas e os hoteis que se derrubaron", declarou un portavoz da Axencia Nacional de Xestión de Desastres.

(Actualizada ás 9.00 horas)
O balance oficial de vítimas mortais por mor dos fortes tremores de terra que sacudiron esta cuarta e esta quinta feiras a illa indonesia de Sumatra ascende a 220, segundo confirmou un portavoz da axencia nacional de urxencias de Indonesia.

O voceiro indicou que as mortes se rexistraron na cidade de Padang, na costa oeste, e sinalou que as autoridades atenderon desde o inicio do terremoto polo menos 168 persoas feridas. O primeiro sismo, a cuarta, foi de 7,6 graos na escala de Richter. A terra volveu tremer a quinta na mesma zona, cunha intensidade de 6,8 graos.

O xefe do departamento de prevención de desastres do Ministerio de Sanidade de Indonesia, Rustam Pakaya, afirmou, antes de que se producise a potente réplica, que poderían ser "milleiros" as vítimas mortais. Centos de persoas poderían estar sepultadas entre as vivendas destruídas.