Vieiros

Un informe da organización de dereitos humanos B'Tselem constata que máis da metade dos mortos durante o masacre de 22 días levado a cabo polo Exército de Israel en Gaza eran civís.

As cifras achegadas coinciden coas publicadas por outros grupos como Amnistía Internacional e o Centro Palestino a prol dos Dereitos Humanos e difiren das que manexan os militares israelís, que aseguran que a maioría eran milicianos.

B'Tselem contabilizou 1.387 palestinos finados: 773 civís (320, menores de 18 anos), 330 combatentes, 248 policías e outras 36 persoas que a organización israelí non foi quen de determinar se eran policías, combatentes ou civís.

Acusacións do Exército israelí
Pola súa banda, o Exército de Israel defende que o número de palestinos mortos foi de 1.166: 709 combatentes, 295 civís e outras 162 persoas sen determinar.

Os militares argumentan que as cifras de B'Tselem se basean en blogs e outras fontes vinculadas a Hamas. Porén, segundo informou a organización nun comunicado, a investigación levouse a termo recompilando testemuñas dos superviventes e documentos das casas destruídas polas bombas.