Vieiros

Este sábado de mañá grupos de indíxenas mantiñan como reféns a 38 policías e 20 civís, que custodiaban unha estación de bombeo de petróleo en Imazita (Bagua, norte do Perú, na rexión da Amazonia). Porén, a media mañá o ministro de Defensa peruano, Antero Flores Aráoz, informou que nove dos axentes morreron, e sete están desaparecidos, mentres que outros 22 foron liberados e atópanse a salvo nun cuartel militar da zona.

Mais de 30 indíxenas falecidos
Segundo os líderes indíxenas, nos enfrontamentos en Bagua tamén faleceron uns 30 nativos. A cifra muda, segundo o goberno, a cinco civís falecidos.

Tras case dous meses de tensión, esta sexta feira estalou a violencia entre o goberno do Perú e as comunidades indíxenas da selva amazónica. Máis de 60 tribos peruanas, aglutinadas na Asociación Interétnica de Desenvolvemento da Selva Peruana (Aidesep) levan 58 días bloqueando as estradas, vías fluviais e oleodutos na rexión amazónica de Loreto, perto da localidade de Yurimaguas.

Revolta indíxena
Varios grupos indíxenas -perto dunhas nove mil persoas- ergueron campamentos artificiais en Yurimaguas, para bloquear uns 10 quilómetros, nunha acción coa que pretenden defender os seus recursos naturais. A mobilización armouse para demandarlle ao Congreso do Perú que derogue varias leis aprobadas polo goberno, en gran medida, para axeitarse ás condicións do Tratado de Libre Comercio con Estados Unidos, dirixidas a incentivar o investimento privado nas zonas ricas en petróleo e gas, Os indíxenas consideran que estas normas afectan o seu dereito a unhas terras que conforman os seus asentamentos históricos.

A revolta indíxena levou o Congreso a revisar o contido dos decretos lexislativos, mais a pasada quinta feira os congresistas decidiron postergar o debate sobre a Lei Forestal, que os nativos consideran inconstitucional. A Defensoría do Pobo apoia as reivindicacións dos pobos nativos, e presentou un recurso ante o Tribunal Constitucional, para que se pronuncie sobre esta lei.

A noticia nos xornais peruanos:

• El Comercio: García responsabiliza a 'politiqueros' por la violencia en Amazonas
• Correo Lima: Infierno en la Amazonía
• La República: 22 policías fueron liberados en localidad de Imacita
• Enlace Nacional: Enfrentamiento entre policías y nativos en Bagua deja trágico saldo
• Na web da Aidesep: Comité de Lucha de Amazonas repudia acciones del Gobierno en contra de hermanos amazónicos
• Noticias de Bagua: Información minuto a minuto
• Reportaje al Perú: Vídeos e entrevistas cos indíxenas
• Peru Indymedia: Vídeo / Imaxes / Bagua arde mientras Alan García premia al biocomercio