Vieiros

Este luns pechouse o prazo de preinscrición para Xuventude Galiza Net 2009, organizado pola Dirección Xeral de Xuventude. Aínda que nesta ocasión se aumentaron a 1.200 as prazas para o encontro informático, todas elas acabaron esgotándose ao pouco tempo de se abrir a web de preinscrición, o sábado ás 17 horas.

Agora, as persoas admitidas dispoñerán dunha semana para aboar o importe que dá dereito a participar en Xuventude Galiza Net 2009, que ademais este ano fai o seu décimo aniversario. Antes desta fase de preinscrición, os participantes no encontro de 2008 xa tiveron a oportunidade de confirmar a asistencia a este foro, que terá lugar do 3 ao 5 de abril no Multiusos Fontes do Sar, en Compostela.

Será a primeira vez que XGN se desenvolva nese recinto, cunha superficie de máis de 10 mil metros cadrados e un aparcadoiro con capacidade para máis de 500 vehículos. Un ano máis, o operador de cable R ofrecerá unha conexión de alta velocidade de fibra óptica aos asistentes durante as tres xornadas de duración do encontro.

O pavillón central do Multiusos estará ocupado pola intranet, mentres que a extranet (área aberta ao público en xeral) estará emprazada no recibidor da entrada, cuns mil metros cadrados de superficie. Nas oito salas de actividades impartiranse cursos, palestras e obradoiros. Ademais, o edificio conta con todos os servizos necesarios para poder pasar os tres días sen saír do recinto.