Vieiros

O Concello de Lleida poderá, dende este sábado, multar ás prostitutas que exerzan a súa actividade na vía pública, e a aquelas persoas que contraten os seus servizos, tras a entrada en vigor dunha nova normativa municipal que foi aprobada en pleno hai un mes. O novo réxime sancionador prevé multas de entre 300 e tres mil euros, tanto a uns como a outros.

O PSC, que ten maioría absoluta no consistorio, contou, para a aprobación da norma, co apoio de CiU e PP, mentres que ERC abstívose, á espera de poder comprobar as consecuencias da aplicación da ordenanza, e ICV votou en contra, ao considerar que "criminaliza as traballadoras e os traballadores sexuais".

A ordenanza de civismo estipula dúas fases de actuación dos axentes da policía local. Primeiro, débenlles pedir ás prostitutas que desistan de exercer a súa actividade. Nunha segunda fase, e no suposto de que estas recusen a deixar o seu traballo, ou se o servizo se desenvolve, o axente interporá unha denuncia que poderá derivar nunha sanción.