Vieiros

O Defensor del Pueblo (valedor do pobo español) emitiu un informe monográfico sobre os centros de protección de menores, no que critica que "moitos" dos centros vulneran os dereitos dos mozos e as mozas, acolléndose ao que denominan "medidas educativas creativas" ou "medidas correctoras". O informe será remitido á Comisión Mixta Congreso Senado para as relacións co Defensor del Pueblo.

O informe revela que o 75% das institucións dá tratamento farmacolóxico aos menores en caso de grave alteración, e a maioría dos centros aplica contencións físicas con frecuencia. Sobre isto o Defensor del Pueblo explica que estas contencións deben facerse "de xeito limitado", e lamenta que en moitas ocasións sexan demasiado frecuentes e agresivas, chegando nalgúns casos a producir lesións físicas.

Outro aspecto do que fala o informe é a aplicación de medidas de illamento, que no canto de aplicarse dun xeito terapéutico concíbense como medidas sancionadoras e intimidatorias. Fala o Defensor del Pueblo das "salas de axitación" ou "salas de reflexión": pequenos espazos sen fiestras coas paredes cubertas de goma negra, que adoitan motivar sensación de asfixia e un grande rexeitamento aos menores.