Vieiros

Galiza aumenta a súa representación no concurso de maquetas máis importante do Estado. O pasado ano, tres semifinalistas no Proyecto Demo de Radio 3, este ano un máis. Noise Project (Valga), Telephones Rouges (O Grove), The (A Coruña) e Franc3s (Carballo), que xa chegaron a esta peneira no 2008. Son trinta bandas de toda España, que dende esta semana e até marzo pelexarán acadar os votos necesarios para ser un dos tres finalistas. Un concerto final e un xurado decidirán o gañador, que actuará no Festival de Benicàssim.

Aínda que os gañadores e finalistas dos últimos anos (Gentle Music Men en 2008, Olimpic en 2007 e Tom Cary en 2006) non están tendo a proxección que tiveron as bandas protagonistas das primeiras edicións (El Columpio Asesino en 2001, Nadadora finalista en 2004, ou Standard, Garzón e Underwater Tea Party, os tres finalistas de 2005), o certame segue sendo un referente para as novas bandas. Até o de agora ningún grupo galego se fixo coa vitoria, pero si que Nadadora foi finalista, e bandas como Triángulo de Amor Bizarro, 6PM, Sebastopol ou Fanny + Alexander tiveron certa repercusión nas edicións que participaron.

Noise Project déronse a coñecer en 2007 co seu álbum Teleclube, que terá a súa continuacióm esta mesma primavera cun novo disco, do que xa adiantaron dous temas no seu myspace ('A madalena' e 'Sempre me toca ser poli'), coas que participan no concurso. Finalistas de Nsaio no camiño e segundos clasificados no GZ Crea 2008, a banda amosa claramente as súas influencias, dende Mercury Rev e Spacemen3, até The Cure.

Telephones Rouges naceu en 2007, momento no que xa participaron no MarcoSonoro organizado por Sinsal en Vigo. En 2008 gravaron o seu primeiro EP, autoeditado. Allein, Biomasa ou Desiderio beben do noise, e en xeral de todo o rock independente de comezos dos noventa, das guitarras ruidosas de Dinosaur JR, Yo la Tengo ou Pavement.

"Imaxinade á Velvet Underground tocando canciones de Joy Division versionadas por The Screamers e os guitarristas de Sonic Youth". Así se presentan The, o trío formado por Jrucho, Miguel e Brais, que ofreceron o seu primeiro concerto no verán de 2008.

Por último, Franc3s presenta tres novos temas, presentes no álbum homónimo que comezaron a distribuír a finais de 2008: Pareja cósmica, Me gustaría verte sangrar e Devuélveme los estómagos que te regalé. Ao igual que as outras dúas formacións, o trío fai moito ruído, cun son sucio moi próximo a The Cramps ou Suicide e un imaxinario de referentes no que se mesturan Alaska, William burroughs, Robert Crumb ou The Devil and Daniel Johnston.