Vieiros

O presidente estadounidense, Barack Obama, pediu xusto despois da súa investidura este martes suspender por 120 días os procesos ante os tribunais de excepción de Guantánamo, de acordo con documentos xudiciais presentados á prensa.

"No interese da xustiza, e a petición do presidente de Estados Unidos e do secretario de Defensa, Robert Gates, o Goberno solicita, respectuosamente, que as comisións militares autoricen o adiamento dos procesos mencionados anteriormente deica o 20 de maio de 2009", di a moción que será presentada esta cuarta feira a dous fiscais.

Un destes fiscais, Stephen Henley, está ao cargo do proceso contra cinco homes acusados de axudar a organizar o ataque do 11-S. O segundo, Patrick Parrish, examina o caso de Omar Khadr, un canadense arrestado cando tiña só 15 anos en Afganistán. Serán estes dous xuristas os encargados de decidir se aceptan ou non a petición do Executivo.

A prisión de Guantánamo abriuse en 2002 no marco da "guerra contra o terrorismo" lanzada polo goberno de George W. Bush. Os tribunais de excepción foron creados en 2006, e actualmente están ao cargo de 21 casos, 14 deles asignados xa a un xuíz, sobre un total de perto de 245 detidos, de acordo con datos do Pentágono.

• Investidura: Barack Obama xura o seu cargo