Vieiros

A Xustiza condenou o Simon Bikindi, un dos cantantes máis famosos de Ruanda, a 15 anos de prisión por incitar á violencia durante o xenocidio de 1994. O músico realizou un discurso dende un vehículo equipado con altofalantes, animando os membros da etnia hutu a asasinar os da tutsi, que cualificou de "serpes".

Os avogados da acusación pedíranlle ao tribunal, amparado polas Nacións Unidas e con base en Tanzania, a cadea perpetua para o acusado, detido hai sete anos en Holanda. Segundo informa a canle británica BBC, posibelmente recorrerán a sentenza. Uns 800 mil tutsis e hutus opostos á violencia morreron nas matanzas que se produciron ao longo de 100 días.

No auto, O Tribunal Internacional para os Crimes en Ruanda (ICTR, nas súas siglas en inglés), sinala que as cancións de Bikindi, amplamente difundidas naquel tempo, fomentaran o odio contra os tutsis. Porén, di que se escribiron antes do xenocidio e que non hai evidencias de que se interpretasen en 1994.

Xa que logo, o tribunal condena expresamente o Bikini -que tamén foi funcionario do Ministerio de Deportes e fundou un coñecido ballet- polo discurso pronunciado na estrada principal entre Kivumu e Kayove, no noroeste do país, en xuño daquel ano.

Nun primeiro momento pediu o exterminio da minoría tutsi, e no camiño de volta preguntou polos altofalantes se cumpriran coa encomenda. Simon Bikindi tamén está implicado na organización da milicia Interahamwe