Vieiros

Aínda que Google non ofrece todos os seus servizos en galego, nin deu datas concretas sobre a súa posta en marcha na nosa lingua, é ben consciente da súa existencia. Así, se usamos o seu servizo de correo electrónico, Gmail, podemos comprobar que a publicidade contextual detectará se estamos a recibir ou escribir mensaxes en galego. En conversa con Vieiros, un representante do xigante internáutico non confirmou que a opción fose a ser dispoñibilizada a curto prazo.

A empresa estadounidense dispón de versión na nosa lingua do seu buscador xeral, do de imaxes, dos mapas e do directorio, mais non do resto dos seus servizos. Aínda que os propios usuarios poden -e deben- traducir voluntariamente as cadeas de texto, o certo é que algúns dos servizos web con todas as mensaxes trasladadas completamente ao galego dende hai tempo non se poden usar no noso idioma.

O feito de que inclúa publicidade en galego, e sexa capaz de recoñecer os textos que están na nosa lingua e non noutra, dá que pensar por que non se ofrece, por exemplo, Gmail en galego. Acaba de incorporar novas cores e temas, e segue sumando novos idiomas, mais o noso segue agardando.

Paradoxalmente, o Gmail si conta coa interface traducida á nosa lingua, malia non estar dispoñíbel. Hai tres anos, e dúas horas despois de que Vieiros publicase unha nova chamando a atención sobre a ausencia desa tradución, internautas do país metéronlle man ao asunto e completaron daquela a tradución en tempo récord.