Vieiros

Baixo o lema de “a crise que a pague o capital”, a CIG convocou concentracións este xoves nas sete cidades do país e en Viveiro. Segundo a central nacionalista, máis de 15 mil persoas participaron nos diferentes actos “contra a crise económica e a falta de medidas reais das administracións”.

Na manifestación de Vigo, que resultou ser a máis concorrida, o secretario xeral da CIG, Suso Seixo, afirmou que “estamos aquí para exixir responsabilidades políticas a aqueles que defenderon e xustificaron este mdoelo económico baseado na especulación, á marxe da economía real, que permitiu aos especuladores amasar grandes fortunas”.

Seixo demandou medidas “contrarias ao que viñan sendo as políticas neoliberais”. Así dixo que era preciso rematar cos paraísos fiscais e defender un sistema fiscal progresivo e demandou un incremento de impostos ao capital.