Vieiros

A situación é crítica, segundo coinciden en avaliar os principais colectivos que actúan no Congo. "Ducias de milleiros de persoas aseguen fuxindo dos combates, cuns desprazamentos continuos que fan imposíbel as operacións de axuda humanitaria", sinalaban este xoves desde o Comité Internacional da Cruz Vermella (CICR).

O propio Programa Mundial de Alimentos das Nacións Unidas tivo que paralizar a distribución de alimentos no contorno da cidade de Goma. Durante a semana a asociación Action Aid xa decidira paralizar a súa actividade e retirar o persoal do país. O mesmo anunciou Intermón Oxfam, laiándose de non poder despregar os equipos de distribución de auga potábel e outros produtos de primeira necesidade entre a poboación.

O incremento da violencia nos últimos días, coa ofensiva lanzada polo grupo tutsi liderado por Laurent Nkunda fixo a situación insostíbel. No medio do caos, unido á violencia militar infórmase agora de saqueos e violencia a pé de rúa en tendas e fogares. Mentres, non se estaría cumprindo a promesa das forzas rebeldes de Nkunda de facilitar a creación de "corredores de emerxencia" por onde distribuír con seguridade a axuda á poboación.

Fronte a esta situación, Amnistía Internacional propuxo que se reforcen as tropas de paz da ONU advertindo que se non hai un esforzo por protexer os civís o Congo camiña unha vez máis cara a "unha catástrofe humanitaria". Malia a gravidade e a urxencia de actuación, a Unión Europea permanecía este xoves enleada na discusión e sen acordo sobre a forma de afrontar a crise e o envío ou non de soldados europeos.