Vieiros

Máis de catro horas e medio de pleno non serviron para pechar a grave crise que sofre o goberno local de Ferrol. O acalde, o socialista Vicente Irisarri, non foi quen de sacar adiante a Lei de Grandes Cidades, que lle permitiría gobernar en minoría. O rexedor asegurara que esta lei era a “ferramenta” para gobernar en solitario a cidade. Porén, os sete concelleiros do PP, os tres de Independentes por Ferrol e os dous do BNG votaron en contra. Os seus socios, Esquerda Unida (4 edís) optaron pola abstención logo de pedirlle por activa e por pasiva ao rexedor que sacase o punto da orde do día. Os sete concelleiros socialistas non chegaba para sacar adiante a polémica iniciativa.

Unha boa proba proba da gravísima fenda existente no goberno é que PSdeG e EU se reuniron pouco antes do pleno e non lograron achegar os seus posicionamentos. Pouco antes de chegar ao punto da Lei de Grandes Cidades houbo un receso. Aínda así, o alcalde negouse a retirar o polémico punto asegurando que era urxente e necesaria para a “modernización da cidade”.

Nin Irisarri nin Iolanda Díaz quixeron facer declaracións ao remate do pleno. Agárdase que este mesmo martes se renuden os contactos entre PSdeG e EU para evitar que o goberno local salte definitivamente polos aires. A tenente de alcalde, Iolanda Díaz (EU), pediu desculpas publicamente á cidadanía polo “espectáculo dado nos medios” nos últimos días e recomendoulle ao PSdeG que fixese o mesmo. ,