Vieiros

Nevada é un dos Estados norteamericanos con maior número de habitantes de orixe vasca, xunto a California e Idaho, cousa que se coñece que sabían os asesores do candidato demócrata á presidencia dos EUA, Barack Obama. Durante a campaña o Comité de Apoio a Obama de Nevada lembrou os vascos, e repartiu varios pasquíns coa propaganda electoral traducida ao éuscaro.

O pasquín en cuestión, que agora amosan as webs vascas Goiena.net e Sustatu.com (e que se pode ver a carón desta información) foi recollido nun mitin na cidade de Reno, cando Hillary Clinton e Obama loitaban por liderar a candidatura demócrata ás eleccións presidenciais.

Nos EUA hai, na actualidade, destacados políticos de orixe vasca en ámbolos dous bandos. No republicano está Pete Cenarrusa, quen foi secretario de Estado de Idaho. No demócrata destacan John Garamendi, vicegobernador de California (xa anunciou a súa candidatura para gobernador do Estado nas eleccións de 2010); Rafael Anchia, deputado da Cámara de Representantes de Texas; e Dave Bieter, alcalde da cidade de Boise (Idaho). Anchia e Bieter amosáronse, dende o comezo da campaña, claros partidarios de Obama. De feito, Bieter mesmo chegou a berrar un sólido "Gora Obama!" (Viva Obama!) nun mitin na súa cidade.