Vieiros

O Partido Socialdemócrata Austríaco (SPÖ) resultaría a formación máis votada nas eleccións lexislativas deste domingo en Austria, segundo as proxeccións da televisión pública ORF, divulgadas logo do peche dos colexios electorais.

Porén, os grandes vencedores serían os ultradereitistas da oposición, que xuntos poderían acaparar case o 30% dos sufraxios. O Partido Liberal (FPÖ) de Heinz-Christian Strache subiría do 11% ao 17,9%, mentres que a Alianza para o Futuro de Austria (BZÖ) de Jörg Haider chimparía do 4,11% de hai dous anos ao 11,9%.

O SPÖ, pola súa banda, obtería o 28,6% dos votos, perdendo case 7 puntos respecto aos comicios de 2006, seguido do Partido Popular Austríaco (ÖVP) con un 25,1%.

Os grandes perdedores serían os socios dos socialdemócratas na coalición de goberno fracasada, que durou só 18 meses, o Partido Popular (ÖVP) do actual vicechanceler e ministro de Finanzas, Wilhelm Molterer, que descendería nove puntos, deica o 25,1%.