Vieiros

Un mexilloeiro permanece ingresado na Unidade de Coidados Intensivos (UCI) do Complexo Hospitalario Universitario de Santiago (CHUS) por mor dos enfrontamentos rexistrados entre produtores e forzas de seguridade en Arousa. Neste mesmo suceso resultaron feridos catro axentes da garda civil e unha decena de manifestantes, que trataron de impedir a descarga do mexillón con destino aos cocedoiros.

Quinta xuntanza
Mentres, os representantes do sector están citados a unha xuntanza de urxencia nas dependencias da Xunta, en Santiago. A Consellaría de Pesca convocou a quinta xuntanza entre os produtores, esta de urxencia, para mediar no conflito, malia que o luns aseguraba que non interviría a non ser que houbese unha disposición para o acordo. Non obstante, só acudiu a Plataforma de Distribución do Mexillón (Pladimega), convocante do paro, mentres que non se presentaron a Federación Arousa Norte, a Asociación Virxe do Rosario nin Conde Udra.

Dende Virxe do Rosario xa se adiantara nos pasados días que non se volverían sentar nunha mesa con organizacións "que exercen o terrorismo", en referencia á colocación o pasado domingo de artefactos explosivos no porto de Vilanova. Pola súa parte, Pladimega amosouse disposto a falar coas outras organizacións, pero non con esta, precisamente por lles chamar terroristas. Con todo, o conflito continúa a enquistarse dende que o pasado martes dese comezo o paro indefinido, que afecta xa ao 80% da produción. A razón que esgrime Pladimega para manter a folga é a exixencia de que a repartición de vendas sexa equitativa coas bateas de cada colectivo.

Os enfrontamentos entre antidisturbios e os 500 produtores que bloquearon a entrada ao peirao de Vilanova non impediron na xornada de onte a saída de 200 toneladas de mexillón en nove camións escoltados pola Garda Civil e a Policía Nacional. Tamén no día de hoxe un cocedoiro de marisco confirmou que recibirá cargamento do molusco, polo que a subdelegación do goberno español en Pontevedra xa adiantou que os corpos de seguridade volverán vixiar o tramo polo que circularán os camións.