Vieiros

"Non imos permitir que se siga degradando a nosa ría", sinalan desde a Plataforma Cíes pola Defensa da Ría de Vigo. O conxunto de colectivos que a apoian levarán adiante unha campaña informativa para achegarlle aos cidadáns a implicación das actuacións previstas por Portos de Galicia e a Autoridade Portuaria de Vigo.

A Plataforma critica que despois da rolda de contactos aberta pola Autoridade Portuaria cos colectivos sociais do contorno se leven adiante as actuacións xa planificadas "sen ningunha modificación". Eloi Piñeiro, presidente da Plataforma, explicou para Vieiros que a entidade portuaria prometera unha valoración argumentada das propostas e paradoxalmente agora "comézanse a encargar con présa e correndo" as ampliacións portuarias do peirao do Areal e da terminal de Bouzas.

Por este motivo, a Plataforma expresa a súa "sorpresa" e "indignación" fronte á falta de resposta das administracións diante das demandas cidadáns. "Parece que o PSOE non está polo diálogo", láiase Piñeiro, criticando o "desamparo" que na súa opinión sofren as demandas do amplo número de colectivos que apoian esta plataforma cidadá. A denuncia da xunta directiva da Plataforma apunta neste caso de xeito concreto, ademais de ao proxecto de ampliación da Autoridade Portuaria, tamén contra o elevado número de prazas de amarre para a ría que prevé o Plan Director de Instalacións Náuticas Deportivas. "Ambas actuacións carecen dun diálogo real previo e de consenso social", quéixanse.