Vieiros

"Desde hai cincuenta anos non se fixo nada serio polo tren en Galiza", critica Fernando Gómez, coordinador da Plataforma "Salvar o Tren", organización convocante da concentración este mércores en Santiago.

O despregue da alta velocidade no eixo atlántico, "mal chamado AVE", segundo subliñan desde o colectivo, está indo paralelo á supresión das estacións onde o tren paraba ao longo deste traxecto. Padrón, Catoira ou Portas son algunhas das paradas eliminadas e non serán as últimas.

Os prezos da viaxe podería até "cuadruplicarse"
A Plataforma Salvar o Tren láiase de que coa escusa do TAV se estea suprimindo "o tren do pobo". Citan ao respecto a previsión de que un cidadán para moverse na liña atlántica deberá afrontar taxas que se moverán entre dúas e até case catro veces máis que as da actual "liña rexional".

"O AVE é o competidor directo do avión, e en ningún momento vai dar servizo diario aos usuarios que nos movemos habitualmente en distancias cortas", sinala Fernando Gómez. O voceiro do colectivo advirte de que Fomento está eliminando "apeadeiro tras apeadeiro", mentres a Xunta se mantén "indiferente" fronte a esa estratexia. Gómez compara o desmantelamento dos servizos ferroviarios de proximidade en Galiza co que acontece noutras zonas do Estado, "onde se está apostando por dobre vía electrificada e pola promoción destas liñas".

A Plataforma defende que o tren é un medio "de futuro" máis respectuoso co ambiente, e que a estratexia de Fomento en Galiza vai rematar "metendo moita xente á estrada", fomentando o colapso e a sinistralidade.