Vieiros

O presidente do Banco Pastor, Xosé María Arias, admitiu este sábado que a entidade "estase a posicionar" para entrar no negocio eólico en Galiza, unha vez que a Xunta aprobou unha nova regulamentación, que primar a participación pública á hora de conceder os parques.

Porén, durante unha entrevista concedida a RNE, eludiu revelar máis detalles, aínda que apuntou que na actualidade xa participan nalgún proxecto.

Regulamento eólico e accións en Fenosa
Preguntado sobre os requisitos do Goberno, Arias reivindicou a acción do Banco Pastor nos seus 40 anos de vida á hora reinvestir no país. Neste senso proclamou que se senten "moi galegos", e resaltou que perto do 70% das accións particulares proceden de Galiza.

Sobre a venda de parte das accións de Unión Fenosa que mantiña a entidade, comentou que a eléctrica ten que camiñar cara a "horizontes maiores", porque a súa presenza "xa non é tan necesaria".

Crise de liquidez
Por outra banda, o presidente do Banco Pastor vaticinou que a venda de vivendas no Estado se reactivará en tres ou catro meses se a situación económica se mantén nas condicións actuais, polo que, ao seu xuízo, se superará unha parálise "esaxerada" na demanda.

Segundo Arias, nestes momentos, non se está a padecer unha situación de crise nin de recesión, senón de desaceleración, aínda que matizou que dependerá da súa evolución nos vindeiros meses. Ademais, apuntou que neste "arrefriamento" da economía inflúen varios acontecementos externos, como a crise de liquidez.