Vieiros

Os oito mariñeiros galegos dos nove barcos que levan dende hai un mes inmobilizados no porto Santo Tomé, en Gabón, poderán regresar ás súas casas esta quinta feira. A compañía armadora, Astipesca, de Huelva (Andalucía) comprometeuse finalmente a pagarlles os billetes de volta ao aeroporto de Faro (Portugal).

Así o confirmou o patrón dun dos nove barcos, o Ontre IV. En declaracións á Radio Galega, Xesús Brión sinalou que tiñan a "esperanza" de poder regresar a Galiza esta semana. Neste mesmo senso tamén se manifestou o presidente da Asociación española de Titulados Náutico-Pesqueiros (Aetinape), Xosé Manuel Muñiz, que dende que tivo coñecemento deste caso -no que están afectados oito mariñeiros do noso país e outros moitos andaluces- estivo a realizar xestións para facilitar a súa repatriación.

Este martes o subdirector xeral de Acción Social do Instituto Social da Mariña, José Manuel Pérez, comunicoulle a Muñiz que a empresa se comprometeu a pagar os billetes de volta á tripulación, despois de estaren un mes inmobilizados no porto de Santo Tomé ante a imposibilidade da armadora andaluza de pagar o combustible aos nove buques para permitir o seu regreso á casa.

Sen alimentos
O deputado nacionalista, Bieito Lobeira, advertiu que a situación "é grave e desesperada mesmo dende o punto de vista humanitario", xa que apenas teñen alimentos para poderen vivir a bordo. Ao respecto, as autoridades da Embaixada española en Gabón comprometéronse a achegar "os víveres e manutención necesaria" se se vivisen casos de necesidade.