Vieiros

A lingua catalá da Faixa goza de boa saúde, o seu emprego é bastante estábel, mais os dereitos lingüísticos dos seus falantes non son recoñecidos pola lei. A esta conclusión chegou o sociólogo Natxo Sorolla tras analizar o último Estudo Sociolingüístico da Faixa, feito en 2003 polos gobernos catalán e aragonés.

La Franja de Ponent, o Aragón oriental
Segundo o estudo de Sorolla, presentado este domingo nunha Xornada sobre Transgresión Cívica en Barcelona, máis do 90 por cento dos habitantes da Faixa (La Franja) falan habitualmente catalán, "a meirande porcentaxe de todos os territorios de fala catalá". Pola contra, só o 30 por cento é quen de escribilo.

En canto ao emprego do catalán, é maior no ámbito familiar, pero vaise reducindo no ámbito público, como nos comercios, no banco ou no médico, e o 20 por cento emprégao para se dirixir aos descoñecidos.

Ante estes datos, Sorolla considera que "hai un coñecemento oral moi amplo, pero o escrito está máis limitado. O seu emprego está bastante xeneralizado e a súa transmisión de pais a fillos está estabilizada e mesmo vai a máis. É dicir, hai máis fillos de familias castelanfalantes que acaban por falar en catalán que á inversa".

Catalán, maellano ou chapurreau?
O sociólogo Natxo Sorolla tamén sinala que o 20 por cento se refire á lingua que fala como catalán; un 35 emprega palabras coma fragatino ou maellano; e un 44 por cento usa o termo pexorativo ou despectivo de chapurreau, aínda que ao parecer de Sorolla, "esta última porcentaxe vai diminuíndo".