Vieiros

A Consellaría de Innovación e Industria decidiu darlle tres meses máis á empresa mineira Rocas, Arcillas y Minerales S. A. de Serrabal para que entregue o estudo de impacto ambiental necesario para que se estude a prórroga da concesión. O departamento autonómico atendeu a petición feita pola compañía o 14 de decembro, e tivo en conta que haberá que someter á avaliación de impacto ambiental a totalidade do proxecto de prórroga.

A consellaría lembra que a Lei de réxime xurídico das Administracións Públicas permite suspender o prazo máximo legal de resolución dun procedemento se se deben solicitar informes preceptivos, como é o caso. Así, xustifica a súa decisión no carácter técnico e na complexidade do estudo de impacto ambiental. Os tres meses adicionais computarán a partir do día seguinte á notificación do requirimento do estudo á empresa, que foi o 3 de decembro.