Vieiros

A loita recente dos veciños de Merexo contra a esixencia de expropiación de 270 mil metros cadrados de terreos para outorgarllos a un proxecto de piscifactoría; a polémica cuns chalés dentro do Parque de Corrubedo; as edificacións en espazos protexidos na lagoa da Frouxeira, en Valdoviño; a destrución das Brañas de Xestoso, integradas en Rede Natura, entre os concellos de Forcarei, A Estrada e Silleda...

Todo un abano de exemplo de conflitos e denuncias relacionadas con proxectos urbanísticos a pé de espazos teoricamente protexidos. E todos eles, paradoxalmente, no contexto dunha lexislatura na que se anunciou como desafío o incremento da superficie de territorio protexida, do 12% actual até o 18%. Unha extensión que así e todo queda por baixo do 20% da media estatal e do 39% e 27% que respectivamente acadaron Madrid ou Asturias.

Desenvolvemento do marco legal para a atención dos espazos protexidos
O "Plan Director de Ordenación dos Recursos Naturais" proxectado estaría destinado en primeiro lugar a avaliar en detalle o estado de conservación dos recursos e ecosistemas xa existentes baixo Rede Natura e estabelecer en concreto o regulamento aplicábel. O Consello da Xunta decidiu este venres a autorización do inicio da súa elaboración. Será deseñado pola Consellaría de Medio Ambiente, a través da súa Dirección Xeral para a Conservación da Natureza.

Haberá de fixar o marco para a súa ordenación, determinar actividades permitidas e promover a aplicación de medidas de conservación, restauración e mellora dos recursos existentes. Tamén terá que fixar criterios para guiar as actividades socio-económicas neses ámbitos, tanto públicas como privadas, garantindo en todo caso que sexan compatíbeis cos plans concretos de ordenación.