Vieiros

"Que aprendemos da catástrofe do Prestige?". Con esa cuestión se celebrou este luns o seminario organizado pola Universidade Internacional Menéndez Pelayo, financiado pola Fundación Arao. Aló, o conselleiro de Presidencia, Xosé Luís Méndez Romeu, foi máis pragmático e amosou menor euforia da manifestada polo presidente da Xunta, quen afirmara a imposibilidade de sufrirmos outro Prestige.

Así, Méndez Romeu apostou por salientar que aínda no estremo de que unha catástrofe deste tipo é posíbel nas costas do país, Galiza conta con medios "para orientar mellor as decisións operativas". En resumo, fronte á improvisación, descoordinación e inoperancia de hai cinco anos, agora cando menos contamos cun plan de actuación.

Por unha beira, o conselleiro referiuse ao Plan Estatal de Salvamento Marítimo, ferramenta que na súa opinión "dispón de recursos orzamentarios moi importantes" e por outra destacou o deseño den Galiza dun "Plan de Continxencias Marítimas" que regulamenta as responsabilidades de actuación en cada situación de risco. Referiuse tamén á multiplicación de medios, tanto marítimos como aéreos, e a dispoñibilidade de equipos modernos "con máis capacidade de intervención, de arrastre e despregamento de medios de protección fronte a calquera incidente que se poida producir".

Desde un punto de vista científico, a Xunta considera ademais que o coñecemento sobre os efectos da contaminación por hidrocarburos prácticas e metodoloxías de recuperación medioambiental, "a análise e a aplicación de medios de prevención e mesmo a análise matemática dos efectos dunha posible marea con produtos contaminantes é moito maior que entón". "Por primeira vez estamos en condicións de poder intentar facer o que hai cinco anos tivemos que facer dependendo dos medios de investigación doutros países", subliñou Méndez Romeu.