Vieiros

Pasaba un día despois do intento dunha vaga de ataques na rede de transporte da capital británica e apenas un par de semanas dos atentados que deixaran tamén en Londres máis de medio cento de mortes. En pleno día e no metro da cidade, a policía detivo a Jean Charles de Menezes e descargoulle sete tiros que acabaron coa súa vida. Alén da premeditación do asasinato dun mozo de 27 anos que era electricista de profesión e que non chegou sequera a ser consciente do que pasaba, o único vínculo que puido levar aos axentes até el foi que vivía nun área de vivendas próximo a un dos presuntos membros do grupo terrorista.

Desde o primeiro momento, a fiscalía evitou procesar os dous policías implicados directamente no asasinato. Por riba deles, ningún dos seus superiores na operación antiterrorista foi tampouco procesado. Aínda máis, nin sequera se forzaron dimisións a ningún nivel nas forzas policiais, malia que durante o proceso xudicial mesmo chegou a denunciarse que a policía retocara fotos de Menezes e dun dos presuntos terroristas para xustificar un suposto parecido co que explicar o asasinato. O xefe de Scotland Yard, href="http://www.met.police.uk/about/blair.htm">Ian Blair, rexeitou dimitir por "uns feitos que o xuíz describiu como un día único baixo circunstancias extraordinarias". Malia as queixas da familia de Menezes, o caso remata así con só unha multa de 252 mil euros para a policía metropolitana de Londres.