Vieiros

Apenas un par de meses despois de que o Departamento de Xustiza declarase en público a tortura como "práctica deplorábel" o cambio no liderado do ministerio levou a Alberto Gonzales ao seu control e a súa chegada coincidía co envío a diversos funcionarios dun guieiro de novas "tácticas" para o interrogatorio.

Así, en documentos secretos autorizados por Gonzales, por vez primeira déuselle autorización "explícita" a unha mestura de prácticas causantes de dor física e psicolóxica nos interrogatorios de sospeitosos de terrorismo. Entre as tácticas permitidas estarían os golpes na testa, a simulación de afogamento ou o sometemento a temperaturas extremas. A información fíxoa pública esta semana o xornal The New York Times, onde poden ampliar información.

Por outra parte, o secretario de Defensa dos Estados Unidos, Robert Gates, declarou novamente esta semana que podería pecharse o cárcere de Guantánamo. "Dixen en diversas ocasións que me gustaría ver esas instalacións pechadas", afirmou para a prensa chilena durante a súa viaxe a este país. "O que estamos estudando é como facelo de xeito que se contemplen os dereitos das persoas arrestadas e ao tempo que se protexa aos estadounidenses e a outros cidadáns do mundo".