Vieiros

"Os veciños e os ecoloxistas non imos tolerar que os intereses dunha empresa privada estean por riba do interese xeral na conservación do ambiente e do dereito do pobo de Corrubedo a aproveitar de xeito racional e sustentábel os recursos naturais deste espazo", expoñen desde a Plataforma Medioambiental de Corrubedo e a Asociación para a Defensa Ecolóxica de Galiza.

Os colectivos quéixanse de que logo do apoio dos veciños á "preservación dun dos espazos emblemáticos" da diversidade natural galega, agora a administración vai "premiarlles" cunha instalación que cualifican de inaxeitada. Trátase do macroparque acuícola de Corgo-Laxe Brava, que con 308 mil m² será o maior do país. Está nunha zona de costa "practicamente virxe" e que na opinión dos ecoloxistas merecería formar parte do Complexo Húmido de Corrubedo. Á beira, critican a autorización de Pesca para a ampliación das piscifactorías de Seráns, 115 mil m² e Couso, 55 mil m².