Vieiros

"O Bloque vai á capital do Estado non é para facerse a foto diante da Cibeles, senón para reclamar o que é dos galegos", afirmou o voceiro nacional do BNG este sábado no mitin de Ponteareas. "Non pedimos caridade, senón que se invista aquí o que se recada", subliñou lembrando os "máis de sete mil millóns de euros que o goberno español recada en Galiza". Quintana defendeu que a súa formación "fai política realista", mentres "outros fan propaganda".

"Tivo que chegar o BNG á Xunta para educar a Madrid no respecto por Galiza", asegurou, indicando que o goberno español está obrigado a traspasarlle a Galiza 60 millóns "en pagamento da débeda histórica", e subliñando que o BNG "conseguiu que se nos paguen, para o resto deste ano, dezanove millóns".

Quintana destacou que o BNG teña como estrela de seu programa "as políticas sociais", facendo repaso de iniciativas do Consorcio Galego de Servizos Sociais e acusou os alcaldes do PpdeG de confundir a Casa do Concello e os seus usos normais "cun castelo e os usos feudais da Idade Media".