Vieiros

"Os feitos ilícitos que foron levados a cabo no contexto do sistema clandestino de represión introducido pola ditadura militar que usurpou o poder entre 1976 e 1983 resultan insusceptíbeis de seren amnistiados". Dese xeito o afirma a decisión do tribunal que en Arxentina desautoriza o "perdón" que no seu momento promoveu Carlos Menem para os golpistas. Rafael Videla e Emilio Eduardo Massera deberán seguir presos até que morran ou cando menos durante outros vinte anos.

Isto foi posíbel grazas ao recurso que presentara a Asociación de ex Detidos e Desaparecidos e a Liga Arxentina polos Dereitos do Home. O indulto que se bota abaixo tamén beneficiara no seu momento aos militares Roberto Viola e Armando Lambruschini. Deles, só seguen vivos Massera e Videla, que permanecen baixo arresto domiciliario. "Son crimes contra a humanidade, non susceptíbeis de perdón", estabelece a sentencia.

"Existe unha obriga estatal imperativa que deriva do dereito internacional e que consiste en investigar, xulgar e sancionar os responsábeis de graves violacións dos dereitos humanos", indican os xuíces arxentinos, "A necesidade imperiosa de evitar a repetición de tales feitos depende en boa medida de que se evite a súa impunidade e se satisfaga o dereito das vítimas e a sociedade no seu conxunto de accederen ao coñecemento da verdade do acontecido".

Máis en Página 12.