Vieiros

Celso Míguez, 23 anos, completou esta fin de semana unha das mellores actuacións da súa carreira profesional no World Series by Renault, competición considerada como a segunda división da Formula 1.

O pontevedrés puntuou no mítico circuíto italiano en ambas mangas e foi ademais o mellor de entre todos os representantes españois. Míguez acadou un espectacular sétimo posto na primeira carreira e un quinto na segunda, o que lle permite marchar de Monza con dez puntos que o sitúan como quinto da clasificación xeral.

Foi na primeira manga onde o galego amosou o seu talento ao volante. Foi penalizado nas clasificatorias por realizar un adiantamento cunha bandeirola amarela e foi obrigado a saír desde a posición 30 na última liña da grella de saída. Malia este contratempo, Míguez non deu por perdida a carreira e recuperou vinte e tres posicións, catorce delas por adiantamentos a outros pilotos.

Na segunda manga, o piloto do Eurointernational saíu desde a cuarta posición pero un problema na caixa de cambios do seu coche impedíronlle pasar do quinto posto final.