Vieiros

Mireia Represa Pérez, a nova promesa do xadrez galego, xa sumou diferentes títulos dende que comezase a xogar aos seis anos de idade. Agora, na categoría benxamín vén de proclamarse gañadora do Campionato de España de Xadrez, que se disputaba esta fin de semana en Linares (Xaén), considerado o Wimbledon deste deporte, xa que todos os campións mundiais dos últimos 30 anos xogaron aquí e foi precisamente neste lugar onde Kasparov anunciou a súa retirada da competición.

Natural do Val Miñor, Mireia forma parte dende o ano 2008 do Club de Xadrez Laroca de Nigrán. Despois deste éxito, a galega participará no Campionato da Comunidade Europea de Mureck (Austria) do 3 ao 12 de agosto e no Mundial Individual Benxamín en Haldaki (Grecia) do 19 ao 1 de outubro.

No seu palmarés, destacan o título de Campioa Galega na categoría pre-benxamín no ano 2009, polo que foi incluída no grupo de tecnificacion da Federación Galega de Xadrez. Tamén foi campioa pre-benxamin do Circuíto Escolar da Fegaxa. Neste mesmo ano 2010 conseguiu o título de Campioa Galega na categoría benxamín e agora acaba de sumar o de Campioa estatal.