Vieiros

Suso de Toro, polo seu libro Sete Palabras obtivo este sábado o recoñecemento dos Premios da Crítica de Galiza, na súa trixésimo terceira edición, na modalidade de Creación Literaria. O xurado valorou que “é unha obra na que se recolle a súa evolución como escritor, respondendo ás esencias galegas sen renunciar á universalidade”. Tamén o “tratamento de temas fundamentais, como a memoria, o auto-coñecemento e a referencia ao pasado como fórmula para entender o presente e proxectar o futuro”.

Na modalidade de Ensaio e Pensamento, o gañador desta edición foi Manuel Forcadela, polo libro A mecánica da maxia. Ficción e ideoloxía en Álvaro Cunqueiro. Nesta mesma categoría, quedou como finalista o libro de Goretti Sanmartín Nos camiños do entusiasmo. Calidade de lingua e planificación.

Miguel Barros, polo libro Ramón Piñeiro e a revisión do nacionalismo conseguiu o premio na modalidade de Investigación. O xurado valorou o “traballo de investigación completo, que se fundamenta nunha achega documental notábel, que arrisca unha interpretación e unha lectura global ao tempo que ofrece unha construción historiográfica coidadosa da traxectoria intelectual e política dunha figura marcante do pensamento e da historia de Galiza na segunda metade do século XX”.

Xa na categoría de Música, o premio foi outorgado á colección Ars Gallaeciae Musicae, fundada e dirixida dende 1992 por Joam Trilho. Na modalidade de Ciencias e Artes da representación, o premio foi parar a Enrique Acuña, fotógrafo, documentalista e asesor literario, pola súa dilatada traxectoria a prol do activismo cultural en numerosas fontes. E na de Iniciativas Culturais, o premio foi parar á Casa das Ciencias da Coruña, pola longa traxectoria de 25 anos facendo “atractivo, pedagóxico e lúdico o mundo científico para a poboación en xeral”.

Normalización lingüística na Xustiza
Doutra banda, nesta edición foi nomeado Galego Egrexio: Xosé Xoán Barreiro Prado, maxistrado-presidente da Sección Segunda da Audiencia Provincial de Pontevedra. O xurado valorou a súa actividade normalizadora, que vén realizando dende hai máis de 20 anos, no ámbito da xustiza, coa utilización comprometida da lingua galega en milleiros de sentenzas e actos procesuais. Asemade, valora as súas “achegas no campo da fixación dunha terminoloxía xurídica moderna e galega” e a súa “contribución á creación da Irmandade Xurídica Galega”, unha entidade que fomenta o uso da lingua na Administración de Xustiza.