Vieiros

prendo a luz
aínda
        que
              é
                 de
                     día
só para confirmar 

que a loura
segue no caldeiro
que a xanela
non transloce a rúa
que o teu nome
está mal dito
apago a bombilla

para reafirmar

que penso e existo

tamén na penumbra



A celebración do Día das Letras ben o merece. Eli Ríos adianta para Vieiros dúas composicións do seu poemario aínda inédito “nós escoitando o badalo de marienpltz”, co que se fixo acredora do Premio Carral de Poesía 2009. En homenaxe a Uxío Novoneyra achéganos en propia voz os primeiros versos desta súa primeira obra, que supón unha homenaxe á inconografía pop e á literatura galega dos anos oitenta.

O poemario, con prólogo de Alfredo Ferreiro e ilustracións de Baldo Ramos, será presentado o vindeiro venres 28 de maio na Casa da Cultura de Carral, coa presenza da propia autora, de Ferreiro e de Miguel Anxo Fernán Vello, da man da editorial Espiral Maior. Mais agora, Eli Ríos ofrécenos en primicia un adianto da súa obra poética e incorpórase, xunto con Xosé Sixto e a Susana Sánchez Arís, ás Voces en Movemento que Vieiros anda recompilando para o Especial do Día das Letras.


Podes volver ler aquí os Especiais das Letras dos últimos anos:

• No 2009: Ramón Piñeiro. Día das Letras 2009

• No 2008: Álvarez Blázquez. Unha luzada de estrelas

• Especiais do Día das Letras dende o ano 1996 e ate o 2007