Vieiros

"Queremos que descubran os saberes que atesouran e que o reflictan nun programa audiovisual ou radiofónico, valorando os seus coñecementos e fomentando as relacións entre diferentes xeracións". Deste xeito o explican desde o colectivo Ponte nas Ondas ao fío da que será a XVI Xornada de Comunicación Interescolar organizada pola asociación. Unha cita xa consolidada que desta volta conta coa participación directa de 70 centros educativos de Galiza, Portugal, Brasil, Chile, Colombia, Cuba e Arxentina.

A convidados a construíren ponte de comunicación entre alumnado e avós e avoas, desta volta hai tamén un feixe de oportunidades para que calquera aula do país se una a esta xornada festiva a través da rede. Alén do seguimento da propia programación elaborada para este día, velaí un feixe de suxestións para traballar nos centros e, ao tempo, optar ao sorteo de premios diversos, cos concursos que invitan os cativos a enviaren debuxos dos seus avós, fotos antigas deles ou mesmo "a frase ou expresión que máis che gusta dos teus avós".

Toda a información, na web de Ponte nas Ondas.

De paso, achegámosvos a peza 'Ondas alén mar', a canción de Pancho Álvarez e María Solleiro para esta edición de Ponte...nas ondas!