Vieiros

Pouco despois de que a Academia dese a coñecer a súa oposición ao proxecto de decreto do Goberno, a Xunta fixo público un comunicado no que “agradece” a análise crítica e as propostas que “terá en conta” á hora de redactar o texto final. Aínda que a nota intenta ser respectuosa co ditame académico, na mesma déixase entrever que a RAG é parte na discusión xa que “desenvolve un importante traballo na promoción dunha das dúas linguas de Galicia: o galego”. 

Se a RAG deixa claro no seu documento que é precisa unha discriminación positiva da lingua do país para conseguir nun futuro unha igualdade real co castelán, o Goberno teima en falar dun “modelo equilibrado entre as dúas linguas oficiais”, como se a devandita igualdade fose un feito a día de hoxe.