Vieiros

A eterna rivalidade entre dúas das grandes cidades galegas, Vigo e A Coruña, atoparon na fusión das dúas caixas de crédito galegas o escenario perfecto para as súas liortas. Así se demostra novamente ao fío das declaracións que este luns lanzaron os seus rexedores.

Dunha banda, o alcalde da Coruña, Xabier Losada, reiterou a súa aposta pola fusión de Caixa Galicia e Caixanova e propuxo a creación, deste xeito, "dunha grande caixa de aforros liderada pola Coruña e para toda Galiza". Así se pronunciou na recepción institucional de Nadal que cada ano celebra o concello herculino en María Pita, onde anunciou que seguirá traballando na defensa "dos coruñeses e dos seus intereses" e onde sostivo que defenderá "o seu capital acumulado, a súa fortaleza e os seus órganos de decisión". Asemade, asegurou que non permitirá "que se perda o peso financeiro e a capacidade económica" que a cidade xerou "ao longo dos anos".

Pola súa parte, o rexedor vigués, Abel Caballero, asegurou que até o de agora recibiu un respaldo masivo no seu rexeitamento a unha posíbel fusión e acusou ao PPdeG de querer promover "un gran centro financeiro" na Coruña lonxe do "centro industrial que é Vigo". Nesa liña, adiantou que a Lei de Caixas que está preparando o Goberno é "anti-Vigo" e asegurou que o Concello (unha das entidades fundadoras de Caixanova) non vai permitir esa "intromisión". Caballero reiterou que defende un "maiúsculo non á fusión" e que non está de acordo co procedemento que se está a levar a cabo na tramitación da Lei de Caixas.

Feijoo pide que o PSdeG non traizoe a Galiza
Mentres, o presidente da Xunta reclamou ao líder socialista, Manuel Vázquez, que "non defraude" a Galiza apartándose do consenso na reforma da Lei de Caixas. Asegurou que na articulación do novo marco lexislativo das entidades de crédito galegas, só ten dúas opcións: "unirse á responsabilidade ou caer nunha permanente contradición".

En contestación, Manuel Vázquez acusou a Feijoo de "escribir a Lei de Caixas máis politizada, intervencionista e sen independencia posíbel" e enmarcou esta actitude no interese do xefe do Executivo en converter as caixas "nun portelo do Goberno".