Vieiros

Deica as 12h do mediodía deste venres ten de prazo a Fundación Ciclismo Galego, entidade que xestiona o equipo ciclista Xacobeo Galicia, para impugnar a exclusión do cadro da lista de equipos profesionais continentais 2010. Posteriormente, o Xacobeo achegará alegacións antes do 10 de decembro e argumentará a súa apelación nunha audiencia diante do comité de xestión da Unión Ciclista Internacional (UCI), a quen lle corresponde decidir ao respecto, o próximo 16 de decembro.

Ao respecto deste proceso, desde a Fundación Ciclismo Galego son optimistas e confían en que se resolva "dun xeito satisfactorio". "O obxectivo é que o equipo Xacobeo Galicia volva brillar a gran nivel no 2010 nalgunhas das probas máis importantes do calendario internacional", apuntan. O problema xorde da débeda histórica acumulada nas contas da entidade e referida na auditoría que esixe a propia UCI para a concesión da licenza profesional. Unha situación da que a Fundación era consciente e ao fío da cal expoñen que deixará de ser obstáculo en canto envíen á UCI o aval bancario necesario para garantir a solvencia do equipo.