Vieiros

A candidatura alternativa que liderará Gonzalo Caballero nas asembleas locais do PSdeG previas ás provinciais que se celebrarán en outubro esixirá á dirección do partido que nas votacións se pida o Documento de Identidade (DI) e que haxa "interventores e apoderados das distintas candidaturas", segundo fontes próximas a esta alternativa.

Na semana do 7 ao 12 será cando as agrupacións locais celebren as súas asembleas, explicaron a Europa Press as mesmas fontes, que indicaron que nelas se escollerán os delegados para votar nas provinciais, que comezarán precisamente na provincia de Pontevedra.

O grupo da alternativa reclamou que o partido "poña todos os medios en igualdade de condicións ás distintas opcións" e que a elección se faga "con todas as garantías democráticas". Estas reivindicacións son avaladas, segundo as mesmas fontes, polo grupo afín ao ex alcalde vigués Carlos Príncipe. Gonzalo Caballero liderará a candidatura que presente esta opción ás locais --que deberán ser convocadas na próxima semana--, aínda que non está decidido que vaia optar tamén ás provinciais. Así, pretende "dar voz á vontade de cambio de moitos militantes e votantes socialistas".